सोमबार, जेष्ठ ३, २०७८
/
देशमा बिभिन्न ठाउँमा कांग्रेसको सरकारबिरुद्ध प्रदर्शन जारी
मंसिर २९ , २०७७
  दोबाटो संवाददाता
काठमाडौं। प्रमुख प्रतिपक्षी दल कांग्रेसले सरकारविरुद्ध देशव्यापी प्रदर्शन सुरु गरेको छ। 

प्राप्त समाचारहरु अनुसार देशका प्रमुख शहरहरुमा प्रदर्शन सुरू भएका छन्।



सरकारले भ्रष्टचार, कूशासन, कोरोना नियन्त्रण गर्न नसकेको तथा अधिनायकवादतर्फ उन्मुख भएको जनाउँदै कांग्रेसले देशव्यापी प्रदर्शन सुरु गरेको हो। मेचीदेखि महाकालीसम्मका प्रमुख शहरमा प्रदर्शन सुरू भएको कांग्रेसले जनाएको छ। 

तर सामाजिक दूरी कायम गरेर विरोध प्रदर्शन गर्ने भनिएपनि काठमाडौंको प्रदर्शनमा सामाजिक दूरी कायम भएको देखिएको छैन । 

आजको प्रदर्शनमा कांग्रेसका शीर्ष नेता लगायत अन्य नेताले देशका बिभिन्न ठाउँमा सम्बोधन गर्दैछन्।


कांग्रेस सभापति शेरबहादुर देउवाले मकवानपुरमा प्रदर्शनलाई सम्बोधन गर्ने भएका छन्। त्यस्तै, वरिष्ठ नेता रामचन्द्र पौडेल काठमाडौंको शान्तिबाटिकामा प्रदर्शनलाई सम्बोधन गर्ने कार्यक्रम रहेको छ।

उपसभापति विमलेन्द्र निधि भक्तपुर, महामन्त्री डा. शशांक कोइराला मोरङ, सहमहामन्त्री डा. प्रकाशशरण महत झापा, सहमहामन्त्री सुनिलबहादुर थापा धनकुटामा सम्बोधन गर्ने तयारीमा रहेका छन्।


यस्तै पूर्वउपसभापति गोपालमान श्रेष्ठ काभ्रेपलाञ्चोक, पूर्वमहामन्त्री प्रकाशमान सिंह धनुषा, पूर्वसहमहामन्त्री अजुर्ननरसिंह केसी कास्की, केन्द्रीय सदस्य डा. रामशरण महत चितवन, पूर्वकोषाध्यक्ष चित्रलेखा यादव सप्तरी, केन्द्रीय सदस्य गगन थापा कैलालीमा सम्बोधन गर्ने भएका छन्।