शनिबार, माघ १०, २०७७
/
सरकारी निर्णय अटेर गर्दै निजी विद्यालयले लकडाउन अवधिको पनि पुरै शुल्क मागे
असार ७, २०७७
  दोबाटो संवाददाता
काठमाडौं। निजी विद्यालय सञ्चालकहरूले लकडाउन अवधिको पुरै विद्यालय शुल्क बुझाउन भनेका छन्।



निजी विद्यालयहरुको छाता संगठन प्याब्सन र एनप्याब्सनले संयुक्त रूपमा विज्ञप्ति जारी गर्दै अभिभावकहरूलाई २०७६ को बाँकी रहेको शुल्क तथा २०७७ सालको सबै शुक्ल भुक्तानी गर्न भनेका हुन्।

प्याब्सन अध्यक्ष टीकाराम पुरी र एन–प्याब्सन अध्यक्ष ऋतुराज सापकोटाले विज्ञप्ति जारी गरी २०७६ को बाँकी बक्यौता चुक्ता गर्न आग्रह गरेका छन्। विज्ञप्तिमा २०७७ सालको विद्यालयमा बुझाउनुपर्ने शुल्क भुक्तानी गरी विद्यालयलाई सहयोग गर्नुपर्ने भनिएको छ ।

कोरोना महामारीका कारण विद्यालय बन्द हुँदा चरम आर्थिक संकट भोग्नुपरेको निजी विद्यालय सञ्चालकहरूको भनाइ छ।  


कोरोना महामारीपछि आर्थिक संकटका बेला सरकारले निजी विद्यालयलाई राहतलगायत सहयोग नगरेको प्याब्सन र नेशनल प्याब्सनको भनाइ छ।


"लकडाउनले विद्यालय बन्द हुँदा आम्दानी शुन्य भएको छ। विद्यालयमा आश्रित २ लाखभन्दा बढी शिक्षक, कर्मचारी र उनीहरूका परिवारले जीवनयापन कठिन भएको छ," विज्ञप्तिमा भनिएको छ, "भाडामा सञ्चालित विद्यालयले भाडा तिर्न सकेका छैनन्।"